政情：嫻姐頻曝光復出期近
盛傳明年將出選立法會超級區議會議席嘅工聯會副會長陳婉嫻，呢排曝光率好高。佢尋日代表工聯會，踩入屯門出席同中華煤氣公司合辦嘅「關愛長者大行動」開幕禮，雖然嫻姐因塞車搞到遲到，不過現場四百幾位長者嘅熱情並無減退，大家見到嫻姐時不知幾咁高興，除咗不斷拍手掌，仲有長者要求同嫻姐合照添，場面認真熱鬧。
開幕禮結束後，大會安排嫻姐同煤氣公司營運總裁關育材進行家訪，上門探訪幾位長者，其中一位長者南叔同嫻姐講，成日喺報紙見到佢，仲話以前遇到不平事，好彩得到嫻姐咁嘅議員出頭先解決到。呢個時候，身邊嘅關育材即刻幫口話：「嫻姐有復出壓力喎。」南叔聽到猛咁點頭，嫻姐心領神會，難怪心花怒放。
嫻姐之後再去探訪第二位長者葵姨，葵姨一見到嫻姐就笑到見牙不見眼，話自己其實識咗嫻姐好耐添。原來十幾年前葵姨幫過嫻姐助選，負責去大廈「洗樓」叫人投票，佢話當年洗樓真係要逐層樓行㗎。老遠由九龍走到去屯門見粉絲，睇嚟嫻姐復出在望喎！