政情：鬍鬚曾劫數難逃
唔到你唔信！本報喺虎年農曆年廿八搵過術數師傅預測一眾高官嘅兔年運程，根據官員及流年八字計算，算到財爺鬍鬚曾喺農曆兔年二月及九月運勢最差。果然未到二月，鬍鬚曾嘅流年衰運已經陸續降臨，被佢自己嗰份「史上最廢」嘅財政預算案拖垮，引發市民怒吼上街抗議，唔腳軟都幾難。術數師揚言，如果鬍鬚曾唔修改預算案，好難逃過呢劫。
香港術數家協會術數師楊子東早前計算兔年立春八字特色，就係「做官無力，靠山不穩」，仲提到「鬍鬚曾喺農曆二月即使有良謀亦收效不大，去到農曆九月更加衰到貼地，容易出錯，講多錯多」。其中一句「有良謀亦收效不大」，好自然想起預算案建議得不到市民認同，但所謂「良謀」如果得不到市民認同，就等於屎橋，所以楊師傅表達得相當含蓄。
農曆三月累及上司
如果再細嚼楊師傅預測嘅內容，發現生肖屬兔嘅鬍鬚曾今年係本命年，大運行丙戌運，八字用神要用「水」、「木」，所以忌「火」、「土」，而二月辛卯會「火」，自然衰到貼地。楊師傅仲話，鬍鬚曾踏入三月壬辰月就轉行「傷官」運，意思係除咗本身行衰運之餘，仲會累及上司。大家都知道，鬍鬚曾上司只有一個，就係煲呔曾，所以做上司都唔可以獨善其身，要共同諗計拆彈至有得解救。
農曆三月等於新曆四月，咁啱四月十三日就係立法會表決財政預算案嘅日子，能否通過就要睇佢哋兩個沙煲兄弟拆唔拆到彈嘞。不過，即使鬍鬚曾過到預算案呢劫，仲有農曆九月更壞嘅運程等緊佢。正如楊師傅早前講過，戊戌九月嘅「火」、「土」特別旺盛，加上立春八字個「木」燒旺九月個「火」，鬍鬚曾食到應一應，預計又有大鑊嘢發生，呢個月佢會衰到貼地，要到十月之後才得以平穩。
話說回來，任何事情都有因有果，如果唔係鬍鬚曾制訂一份「史上最廢」嘅財政預算案，相信行衰運都有個譜，但眼下怨聲載道，如果觸發大規模上街示威抗議，發展到一發不可收拾嘅話，睇怕鬍鬚曾唔落台都難以謝罪。