中環出更：紀文鳳小時候望代父從軍
女人撐起半邊天，好似紀文鳳咁，事業同善事都做得出色，可惜女兒身令佢喺重男輕女嘅家庭裏受到唔少委屈。尋日佢以聯合國兒童基金香港委員會推廣及公關委員會主席身份，同香港委員會主席陳晴一齊出席基金會搞嘅中國兒童周小畫家大夢想繪畫比賽。講起細個第一幅貼堂作品，原來同佢內心世界有關。
紀文鳳熱愛畫畫，投身廣告業都係因為細個夢想做畫家。佢仲記得自己讀小學第一張貼堂作品，係畫代父從軍嘅孝順女花木蘭。潮州人重男輕女，佢細個一直為自己係女兒身而內疚，好希望可以好似花木蘭代父從軍，事關佢出世之前，個個都以為佢係男仔，仲改定名叫「文龍」，點知落地先知係個巾幗。龍轉鳳令佢細個備受委屈，加上弟弟多年後先出世，佢媽咪壓力亦好大。
陳晴落力幫小朋友
講到做咗媽咪無耐嘅陳晴，五歲開始畫山水畫，佢話呢個活動搞咗四年，好受歡迎，九三年到依家，中國兒童周已籌得逾八千三百萬元善款幫助內地兒童。咁有意義，難怪陳晴做咗媽咪依然落力支持，嚟緊仲會返內地同去國外探訪，幫助多啲小朋友。
陳晴好友、中總副會長方文雄都嚟撐場。佢最近斥資近四十萬元，喺佢家族旗下物業開咗間工作室，除咗畀年輕人塗鴉，仲有導師教導，佢希望可以將呢種文化普及化，同場嘅民政事務局副局長許曉暉都好支持，仲建議可以綠化為題粉飾大廈添。