中環出更：三智「長久」支票為曾老賀壽
退休後盡享含飴弄孫之樂嘅前全國人大常委曾憲梓，早前喺屋企過咗個溫馨嘅七十七歲生日，請埋班好朋友一齊與眾同樂。曾家三兄弟智謀、智雄同智明夾份送張支票畀爸爸，金額係九萬九千九百九十九蚊，寓意「長長久久」。大孫女凱栭、明星新抱黎瑞恩同智明嘅大女，就畫咗張賀卡祝爺爺多福多壽，氹到老人家不知幾開心。
黃英豪送一對金壽桃
曾家開枝散葉，子孫滿堂，壽宴當日個個好孝順，畀足心機製造驚喜畀老人家。不過曾老乜都有，要送咩禮物都幾考工夫。三兄弟一於送錢畀阿爸使，曾憲梓收票時好開心。不過佢踢爆話，三個仔每年生日時，佢都送上五十萬蚊做禮物，相當大手筆！幾兄弟即刻賣口乖，話希望下次送壽禮時拾級而上，最好由九十九萬九千九百九十九一路加上去。其實曾老講笑啫，三個仔咁有佢心，已係最好禮物。
當日「新金王」金至尊主席黃英豪都嚟賀壽，佢係金利來非執董，一做多年。佢送上自家出品嘅一對金壽桃，為壽宴增添唔少歡樂氣氛。有好友就親手將生日蛋糕捧到曾家，為曾老賀壽。
捐二千萬助家鄉發展
過咗生日冇耐，一向心繫家鄉嘅曾老返咗鄉下梅州，豪捐二千幾萬協助家鄉各項發展，包括捐贈九百萬元支持種樹、一千五百萬元喺梅縣興建足球場，再捐錢起老人院等，總之慷慨解囊，支持家鄉。
卓妮