貧富懸殊，社會不公，愈來愈多基層勞工畀無良僱主剝削，工作量愈來愈多，人工反而愈來愈少，甚至連最基本嘅生活都顧唔掂，直頭同做奴隸冇乜分別，有人稱之為「奴工」，一啲都冇誇張。
事實上，香港最大嘅無良僱主就係政府，最多「奴工」嘅地方就係政府部門。近年來，政府部門不斷將工作外判，然後就關人個關，冇監冇管，由得外判商剝削員工，結果喺同一部門內，外判工同公務員做同樣嘅工作，但收入同福利就差一大截，有人用「四無」形容：無人工加、無級升、無前途、無福利！
你可能會問，家陣政府庫房豬籠入水，外判工嘅處境應該有啲改善喇啩？如果你真係咁諗，你就太傻太天真喇，實情係，政府效率促進組調查發現，舊年政府部門有近四千份非工程外判合約，比○八年上升兩成一，但涉及嘅開支反而大減三成，反映外判工嘅薪酬被進一步壓低。難怪多位立法會議員批評，政府以縮減開支為名外判工作，懶理工人死活，帶頭做無良僱主。
講開又講，政府推行外判制，話就話為咗節省開支，提升用人彈性，事實係咪咁呢？功夫茶翻查政府帳目，發現近年公務員整體薪酬開支不減反增，其中○九至一○年度，政府薪酬開支高達七百一十一億元，比上一年度增加二十幾億，佔政府經營開支由兩成六升到三成。即係話，政府推行外判制，根本慳唔到錢。
更弊嘅係，外判制唔可以為政府慳錢，反而為外判商剝削員工提供好大「彈性」。近年周不時聽到政府外判工被剝削嘅悲歌，例如消防處廚師被減三成人工，又如警察總部保安被扣飯鐘錢。而最無良嘅係食環署某外判清潔承辦商，居然訂立幾十條惡例，員工傾偈、食嘢、睇報紙都會被罰款，少則六百幾，多則三千幾，簡直同吸血冇咩分別！
港府吹水唔抹嘴，口口聲聲保障勞工權益，一時講社會責任，一時講企業良心，點知統統係大隻講，外判商公然剝削員工，佢哋當睇唔到，闊佬懶理。其實，外判制度問題多多，係人都知，如果當局真係有心保障勞工權益，一早應該徹底檢討啦。
更加荒謬嘅係，嗰個所謂效率促進組話就話調查外判合約，但對於調查細項，譬如工人嘅薪酬開支等等，居然十問九唔知。睇嚟佢哋唔係效率促進組，而係效率促退組先至啱。
計功夫茶話齋，既然港府高官條條fing，既無法保障勞工權益，又唔肯檢討外判制，甚至連調查外判工薪酬咁簡單嘅事都做唔到，咁不如炒晒佢哋，改用奴工價外判，幫納稅人慳番啲公帑仲好過啦！