政情：金勞詹賭城豬流感驚魂
近日來勢洶洶嘅豬流感，最早由墨西哥同美國爆發。立法會金融服務界代表詹培忠農曆新年啱啱去完美國拉斯維加斯度假返嚟，佢尋日自爆，返港後感冒咗十日，一直唔好，嚇到佢以為中咗招，喺美國染上豬流感，一度相當緊張。好彩醫生後來判症只係一般重感冒，虛驚一場。
金勞詹新春去賭城度歲，除咗例牌入賭場玩兩手試運氣，贏咗八萬美元、大約六十萬港紙之外，原來仲放縱大吃大喝，淨係飲紅酒就晚晚飲足兩支分量，返港後身體終於頂唔順病倒，感冒一直唔好。連平時牙擦擦嘅金勞詹都話：「嚇到我呀，以為係中咗豬流感呀！」金勞詹○七年發現頸部右邊有惡性腫瘤，克服病魔四年，對健康梗係特別關注啦。
經歷過大病嘅金勞詹話，健康最重要，○四年捲土重來當選金融服務界，到明年換屆轉眼已有八年光景，乜都夠皮。雖然有好多人勸佢競逐連任，但佢不為所動，決定明年九月功成身退：「無論做人定做事，平安着陸就最好！」