政情：阮蘇少湄退幕後省鏡咗
「中電一姐」阮蘇少湄（Betty）前年自爆患早期乳癌，請咗半年病假休養，舊年二月復出後低調咗好多。原來Betty轉戰幕後，喺前線衝鋒陷陣嘅工作就交畀接任嘅中電常務董事藍凌志負責。
Betty過去一年公開曝光少咗，但就抽多咗時間出席社交界活動，好似上星期就見佢現身香港友好協進會新春午宴，同一班人大、政協團拜。昨日中電高層與傳媒春茗，當然唔少得佢，只見Betty風采依然，佢話依家健康情況好好，卓妮覺得佢直情精神咗又靚咗添。
當然Betty對中電嘅工作一樣着緊，轉任中電香港副主席之後，佢專責香港及華南業務嘅策略發展，好似西氣東輸、建設天然液化氣站及核電業務發展等大Project咁，都係佢一手包辦。另外，中電明日公布業績，Betty都會親自出馬主持大局。