政情：鄉議局莫財 賣樓還債
鄉議局位於沙田石門嘅新大樓四月入伙。局方為精益求精，工程費超支至一億七千萬元，仲搞到周轉不靈。尋日鄉議局執委會匯報財政狀況，發現過去籌得嘅八千三百萬元善款已經使清光，而馬會捐畀鄉議局嘅四千萬元又未落袋，目前仲欠落銀行七千萬元貸款，估計流動資金到五月時連搵個仙刮沙都無，要急於變賣九龍塘物業還債。
鄉議局會盡快召開特別會議表決出售九龍塘金巴倫道物業，據悉市值約高達二億元，套現後夠畀工程費有凸。不過，舊債未清，大家又討論點樣大搞四月嘅入伙儀式，各鄉事委員會計劃出動三條大龍、三百隻獅子或麒麟，再搞二百幾圍盆菜宴，預計開支高達一百三十萬元。鑑於財政緊絀，副主席張學明建議開支要控制喺一百萬元。
發叔：幾好餸都要離席
即將舉行嘅鄉委會改選風起雲湧，好似鄉議局主席劉皇發就因為屯門鄉委會修章而失落鄉委會及屯門區議會主席寶座。立法會議員詹培忠有日同發叔食飯傾心事，詹Sir叫發叔係時候退下來，否則好似埃及總統穆巴拉克咁被人民推翻就唔好喎，據講當時發叔無乜反應。詹Sir又透露，發叔個仔劉業強無興趣接班。
發叔尋日喺執委會後承認，劉業強的確無興趣做區會主席，做生意好過，又話自己退下來好正常。佢話：「天下無不散之筵席，就算幾好餸都要離席。」