壹傳媒旗下周刊《忽然1周》又亂作古仔，該周刊今期繪影繪聲，話長實集團主席李嘉誠重建深水灣大宅，預留第四層畀其細仔李澤楷與梁洛施加三個BB一家五口，意味梁洛施獲准入宮，又話小小超原本放喺石澳超豪木屋嘅傢俬及相片亦陸續運到深水灣大宅。不過，有可靠消息人士報料，狠批報道係亂作古仔，絕無其事。
消息人士話，事實上現時深水灣李家大宅仍在進行裝修工程，處處沙塵滾滾，今年年底可以入住都可算係奇迹。由於大宅完工需時，所以從沒有搬進任何東西，甚麼已經有傢俬、照片搬入大宅嘅報道全屬虛構，絕無其事。
消息人士批評，《忽然1周》同壹傳媒其他報刊一樣，都係亂作故事，而今期有關李嘉誠大宅嘅報道，又係一亂作嘅例證。
壹傳媒旗下報刊老作新聞已經成咗習慣，為谷銷量譁眾取寵乜都夠膽死，所以話呢，一個爛蘋果爛到入心嘅話，不如丟落垃圾桶好過。