中環出更：霍麗萍「靈光」影展大孖沙撐場
攝影世界，不可思議，唔少人畢生追求影到異象。已故全國政協副主席霍英東家族中有一位奇人，佢就係醉心攝影嘅霍家大小姐霍麗萍（Pat）。Pat霍否認有特異功能，但喺佢鏡頭下，卻經常拍到靈光，令人嘖嘖稱奇。Pat霍尋晚舉行「靈光一現」慈善攝影展，城中大孖沙紛紛現身，見識一幕幕奇景。
Pat霍魅力驚人，尋晚喺中環ifc商場一樓中庭展出二十幅作品，恒基主席四叔李兆基同細仔李家誠（Martin）都盡地主之誼撐場，但就唔見懷咗孕嘅千億新抱徐子淇。新地非執行董事郭炳湘都同太太郭李天穎（Wendy）都到賀，皆因Pat霍同Wendy係好姐妹，Pat霍仲準備將義賣相片所得嘅收益，撥捐Wendy做主席嘅「生命熱線」，提倡防止自殺。
全場焦點，要數霍氏家族，細佬霍震霆（Tim）、霍震寰夫婦、霍震宇嚟齊晒，連Pat霍鮮有露面嘅獨子霍靈山（Alex）都嚟撐媽媽。
唔幫啓剛影結婚相
Pat霍熱愛攝影逾三十年，係家族御用攝影師，Tim霍話，每逢屋企有喜慶事，都係由家姐操刀影相，咁公子啓剛將來結婚，係咪搵家姐影相？Tim霍就舉起酒杯甜笑話：「Happy New Year!」Pat霍都幽佢一默，扮cool話唔會幫啓剛影結婚相，原來咁重要一刻，佢話都係留番畀朱玲玲：「梗係由啓剛媽咪影喇。」
唔少嘉賓都想揭開疑團，想知道點解Pat霍會影到靈光，可惜當事人都摸不着頭腦，直言自從十幾年前被一位道士朋友提醒，叫佢寄情山水、嘗試同山川景物溝通之後，自此經常影到靈光。望見相中異象，佢話一啲都唔驚，反而覺得好靚，係肉眼世界以外嘅自然美。
相片疑幻疑真，四叔李兆基都睇到入晒神。佢透露新年有探望過兒子李家傑嘅三胞胎男孫，仲封大利是畀佢哋。Martin就陪太太子淇及兩個千金遊日本大擦美食，但講到封利是畀囡囡，佢就話金額唔可以太大，怕寵壞女兒。
卓妮好奇，到底子淇呢次係咪佗男B呢？Martin欲言又止表示：「都……到時你哋咪知囉。」卓妮轉頭捉住郭炳湘傾偈，佢笑言自立門戶後唔辛苦，嚟緊有乜新大計，一定會通知大家喎。
卓妮