副局政助不符身價
自由黨主席劉健儀話政府一直本末倒置，淨係識有需要時搵佢哋拉票，解釋政策則完全欠奉。平時鬧人好好火嘅工聯會立法會議員王國興，都以哀莫大於心死嘅語氣呻啲副局政助平時實在太少蒲頭啦，所以叫佢背晒所有副局政助個名，怕且未必背得晒。
做過問責局長嘅新民黨主席葉劉淑儀直頭揶揄政助只係「學神」，有乜理由值十幾萬一個月吖，根本幾萬蚊已經夠啦！佢仲話煲呔曾嘅民望就係自從委任咗班副局政助之後都一直未有起色。
畀人鬧咗差不多一個鐘，林D9只係不斷重複話接受批評，又話明白唔應該「臨急抱佛腳」去拉票，相信下屆特首會檢討吓政府架構㗎啦，即係話，當前嘅局面，點都要再捱多年幾喇。