政情：大輝寸鬍鬚曾耍陰招
「大市場，小政府」大家聽得多，「鬍鬚曾」曾俊華突然提出「大社會」概念，好多人都一頭霧水。立法會廠商會代表林大輝尋日勁寸鬍鬚曾，話唔知鬍鬚曾講乜：「大婆、細婆就聽過，大社會？摷勻康熙字典同牛津字典都搵唔到！」
大輝尋日喺立法會走廊，主動提起鬍鬚曾嘅「大社會」新詞，劈頭第一句就鬧：「都唔明咩嚟嘅！連Google都查唔到。」大輝指，鬍鬚曾身為財政司司長，講嘢唔係講畀自己聽，仲要講明白畀七百萬香港人知，「依家淨係拋個名出嚟，叫『大社會』，聽到大家頭都大埋，咁算點呀！」
拋「大社會」轉移視線
大輝咁嬲，原來係睇唔過眼鬍鬚曾故弄玄虛，當香港人係傻仔，大輝質疑，鬍鬚曾前排反駁「官富民窮」嘅言論引火燒身，突然提出一個唔清唔楚嘅「大社會」概念，根本係苦肉計，博引起爭論，轉移社會視線，然就可金蟬脫殼。「最慘係班教通識嘅老師，大社會喎，都唔知點解釋畀班學生聽。」