政情：林偉強告別區會生涯
鄉事委員會早排改選，連帶影響區議會議席安排。離島區議會主席林偉強唔知係咪見大勢已去，無再選坪洲鄉事委員會委員，連帶無埋區議會當然議員嘅身份，即係話連離島區議會主席都無得做。尋日係林偉強最後一次以區議會主席身份主持會議，不過佢表現得好專業，無乜離愁別緒嘅表現，亦都無因為最後一次主持會議就放軟手腳，亦唔見佢喺會議上同大家道別，個會仲開足四個鐘先完。不過公開會議後，輪到閉門會議環節，個會只係開咗十分鐘，唔知林偉強係咪趁此機會同大家say goodbye？
任職廿六載感不捨
臨別秋波，我哋最後問林偉強有咩感受，佢話唔經唔覺喺離島區議會已經服務咗廿六年，依家要退落嚟，點都有啲唔捨得。不過，佢話呢個係既定制度，就梗要接受喎；佢又不忘多謝同事一直以來嘅協助。新主席會喺四月十八日下一次區議會大會上選出，有離島區議員就話，暫時未收到有同事表示對個主席職位有興趣，亦未見有人拉票。