港鐵近期先後發生路軌爆裂、列車斷路器短路及車長「開錯門」等事件，導致數以百萬計乘客行程受阻，港鐵車務工程總管張少華尋日出席立法會一個委員會，多次被議員問及賠償嘅問題，但佢都係以一句「唔好意思」回應。「唔好意思」呢句口號真係好使好用，除咗為「當年阻住你」道歉，為港鐵起新支線賣廣告，仲可以做擋箭牌，就一切一切引起乘客不便嘅事故，表達「一言難盡」。