政情：馮康掟寶牒盼驅病魔
時下流行保育、活化古蹟，新界東醫院聯網近年亦要追溯歷史文化，繼去年傳媒春茗喺粉嶺圍彭氏宗祠搞盆菜宴後，聯網總監馮康醫生尋日就趁今年大埔林村舉行首屆「許願節」，去林村品嘗鄉村名菜，並且體會一下區內嘅鄉土同歷史文化。佳餚包括用柴火煮嘅客家炆豬肉、蓮藕豬骨湯、鹽焗雞等，食到大家都舔舔脷。
虎年受眼疾困擾嘅馮醫生跟從林村嘅習俗，一齊拋寶牒，祝願大家兔年身體健康、事事順利。希望馮醫生喺新嘅一年踢走病魔，繼續提升區內醫院嘅質素喇。
那打素醫院多「寶物」
大埔那打素醫院前身係位於港島區荷里活道嘅雅麗氏紀念醫院，裏面嘅文物有部分送咗畀香港醫學博物館，大埔那打素醫院入面有個歷史寶庫，亦記載咗呢間醫院嘅歷史起源。該院行政總監鄭信恩醫生尋日就充當導賞員帶大家參觀文物廊，裏面收藏咗唔少寶物，包括舊式嘅呼吸機、護士制服等，大家都大開眼界。