政情：市民選特首 范太大熱
令人引頸以待嘅特首選舉明年初舉行，戰幔雖未正式展開，但兩名熱門候選人政務司司長唐英年及行政會議召集人梁振英（CY），無論在明在暗，早已密鑼緊鼓做緊嘢。有研究組織近日做咗個針對來年特首選舉嘅民調，但結果卻令人跌到一地眼鏡碎，事關最受市民擁護嘅候選人，並非已踏咗半隻腳入閘嘅唐、梁，亦唔係民主派擁護嘅公民黨梁家傑，而係公開講咗無限次絕對唔會選特首嘅全國人大常委范徐麗泰。
社區發展動力培育早前委託香港過渡期研究計劃，訪問咗八百零七名港人對二○一二年新任特首嘅憧憬。調查發現，范太一枝獨秀跑出，足足有六成市民支持佢出任特首，唐唐同袋巾傑就分別以五成三同四成五屈居第二同第三位，僅得三成七支持率嘅CY就做包尾大班。
最弔詭嘅係，雖然范太冇好拚命落區做騷爭取支持，但市民卻視佢如superwoman。調查顯示，無論係最關注通脹、房屋、就業同貧富懸殊嘅基層市民，抑或係關注環境保護同污染問題嘅知青，統統都認為范太最能解決佢哋嘅問題，係做特首嘅不二之選，直情當正佢係萬能女俠。關注經濟發展及「冇咩煩惱」嘅中產，好正路咁傾向支持工商界出身嘅唐唐，捍衞自由嘅市民則支持袋巾傑，至於近年密密曝光嘅CY卻反而食白果，即使同港府唱反調力撐復建居屋，仍未取得市民支持。
前立會主席背景獲加分
負責今次研究嘅浸大政治及國際關係學系教授戴高禮話，市民今次擺明喺知道范太唔會出選嘅情況下，都投佢一票，反映市民對現時兩名熱門候選人都冇好感，難擇其一，仍有一絲憧憬呢位有親中背景但肯講道理嘅「萬能女俠」出嚟幫香港一把；仲話范太嘅前立法會主席背景對佢起咗加分作用，令人覺得佢處事夠公平喎。
已無數次斷言唔會選特首、仲叫過外界唔好再擺佢上枱嘅范太，例牌對此不作回應，但佢尋日出席分享活動時，就自爆佢喺政壇最低潮之時，全靠家人支持，令佢安然度過。唔知喺咁多市民支持下，范太又會唔會考慮收回成命呢？如果范太都出嚟跑，屆時肯定好戲連場囉。