顧明均加薪一倍留員工
內地經濟好景，新春過後，唔少工廠出現有工冇人做嘅情況，令港商們好頭痕。著名廠商南太電子創辦人顧明均都大嘆請人難。為挽留員工，全部獲得加薪一百個巴仙。
顧明均前日現身沙田馬場，為首次出戰嘅愛駒「正白旗」打氣，但馬匹處於熱身階段，三甲不入。輸咗馬，顧明均依然心情靚，春節前佢接到唔少定單，柯打排期排到去七月，認真唔憂做。
但春節前後，內地員工流失率高，咪話唔頭痕。要留人，惟有出動銀彈政策，重賞下成功挽留九成舊夥計，而流失嘅一成員工，喺高薪吸引下，短短三日就請夠人。
九個月內加薪三次
無他，顧老闆出手算闊綽，由去年五月至今一共加薪三次，已向每名員工平均加薪超過一百巴仙，卓妮聽見都心動。人工成本大幅飆升，利潤唔見一截，但顧老闆就話唔介意，員工happy就得嘞。