中環耳目：劉廷安最愛潮州滷水拼盤
中國人壽（海外）公司副董事長兼總裁劉廷安調派來港已是第四個年頭，仲愈來愈投入香港生活，除咗積極參與經濟方面嘅社會公職，躋身港交所上市委員會成員，連飲食口味都本地化，尤其愛地道潮菜滷水拼盤。
貪佳寧娜就腳
劉總話，廣東菜好唔簡單，原來潮州、順德等唔同地方嘅菜式口味都唔同，中國人嘅飲食文化認真博大精深。由於佢哋公司位於灣仔軒尼詩道，一街之隔嘅佳寧娜便成為公司飯聚熱點。過完年後嘅開年飯，中國人壽近二百人就喺度歡聚，為嚟緊一年嘅拚搏注入新能量。
劉總最欣賞嘅潮菜係滷水拼盤，話做保險資金投資最講究Portfolio（投資組合），滷水拼盤嘅Portfolio做得好好，有齊海蜇、鵝片、豆腐、蝦丸同髮菜卷，當中尤以豆腐最好味。卓妮聽罷忍唔住大笑，劉總三句不離本行，連食嘢都掛住做嘢，難怪去年賺咗七億幾，集團董事長楊超應該收貨喇。