中環出更：趙樓神狂掃黑超扮型男

趙樓神向來破格，早前大晒新買嘅黑超去晚宴做「型警」。樓神啱啱喺中東返嚟，鍾情Police呢個品牌嘅太陽眼鏡，所以新春過去見到啱嘅就即買。樓神鍾意呢個牌子嘅眼鏡流線型又有弧度，啱晒面形，今次呢副四千蚊有交易，家吓佢屋企有成六十幾副眼鏡。買眼鏡買得咁爽，買佢最愛嘅樓房唔知又有無咁爽手呢？樓神即時耍手唔答，話唔講得有無買，怕老婆知唔掂。

不過講番佢早前去中東旅行，即時又生猛晒。樓神話中東嗰邊石油同天然氣資源充足，今次過去都有睇吓有咩好投資，不過佢無「索」油，反而掉轉「吸水」，叫啲老友過嚟香港投資買樓，或者幫襯佢哋買基金，旅行都咁勤力，真係好值得年輕人學習。不過佢就幽默話依家幾十歲，有工開好緊要。

成熟型 去年九月出席長實馬鞍山天宇海樓盤記者會時，以「大烏蠅」黑超亮相。

運動型 舊年四月出席大圍名城一期樓盤記者會，就以Sporty太陽鏡上陣。

梁兆基怕遊日買手袋

梁兆基都啱啱同老婆喺北海道滑完雪返嚟，佢話老婆鍾意日本，日圓貴到近十蚊都無所謂，只要唔好買手袋就得，卓妮完全feel到佢上次買限量版手袋送畀老婆有幾赤赤痛。之不過咁梁生對老婆一條心，好似佢今年睇好人民幣一樣，都係咁專一。

啱面形 趙樓神愛戴黑超，貫徹型格。 （溫國佳攝）

梁兆基笑言最驚情人節，因為要為愛妻炮製驚喜。

同場嘅行會成員夏佳理就傷風未愈，不過佢呢排又喺香港，又有出門，所以唔知喺邊度感染。財經事務及庫務局局長陳家強都有同感，事關每次出商務trip好趕急，一日五、六個會閒閒地，所以體力上都幾透支，病咗一啲都唔奇。