社民連年初經歷大地震，立法會議員黃毓民同陳偉業（大舊）更毅然退黨，另起爐灶成立「人民力量」。不過二人雖然口講同社記恩斷義絕，但我哋日前走訪各區，發現二人喺九龍塘又一村及荃灣福來邨掛上嘅橫額，都未曾「改朝換代」，依舊印有社記標誌，似係藕斷絲連，有誤導之嫌。
大舊尋日接受查詢時就話，法律上並冇規定佢哋退咗黨後要即刻拆除舊有橫額，所以自己咁做並無違法，又話由於農曆新年時好多舖頭都休市，所以呢啲橫額遲遲未被拆除喎，更直言：「係人都知我退咗黨㗎啦，點會誤導人呀！」至於黃毓民，我哋喺截稿前都仲未聯絡到佢。
喺民主黨分裂出嚟嘅新民主同盟，同樣觸犯相類問題。身為同盟召集人嘅西貢區議員范國威，喺將軍澳區竟然同時出現印有新民主同盟同民主黨標誌嘅招牌同橫額，一新一舊，令人無所適從，反觀同樣退出民主黨嘅區議員張國強，就已經清一色換晒橫額嘞。