政情：湯恩佳大宅升值70倍
六大宗教領袖日前舉行新春團拜，祝願世界和平，無晒天災橫禍，孔教學院院長湯恩佳更希望兔年經濟暢旺，市民安居樂業。湯恩佳向來將儒家思想融入商道，本身更生財有道，佢話世界經濟環境變化好大，最穩健就係買物業收租，估計樓市會有兩成升幅，但同時希望政府加強協助有需要嘅市民置業。
千多萬元變逾十億
湯恩佳透露，佢喺港九新界都有住宅和舖位物業收租，全部係幾十年來買落，至今已升值以十倍計，好似佢位於石澳嘅大宅，八八年買入價一千三百多萬元，估計至今已升至逾十億元，升幅達七十幾倍。有傳聞話湯恩佳身家高達二百億元，但佢笑稱：「無咁多，幾十億啫！」湯恩佳向來為善最樂，佢希望喺兔年搵多啲錢，捐多啲錢幫助社會有需要嘅人。
孔教學院永遠榮譽院長、一哩賽馬王「好爸爸」馬主袁仕傑都睇好兔年經濟，但佢同湯恩佳一樣認為世界經濟環境變化好大，最穩陣都係投資人民幣。不過，作為發明家同生意人嘅袁仕傑強調，投資都係次要，最重要係搞好公司實務，發明更多產品以提升公司業務。