政情：葉劉願拍節目做捧餐
新民黨副主席田北辰嘅首間地區辦事處尋日開幕，呢間亦係第一間以新民黨名義開嘅地區辦。除咗田二少之外，新民黨主席葉劉淑儀同另一位副主席史泰祖都有到場支持。
田二少之前拍咗套《窮富翁大作戰》，體驗基層市民嘅生活，引起唔少人談論，問到葉劉會唔會倣效，葉劉話，自己以前喺英國讀書都做過捧餐送外賣，仲試過找錯錢冇咗五英鎊，可謂損失慘重，不過如果要佢喺快餐店做捧餐，佢都可以一試嘅。葉劉又透露，屋企個菲傭尋日都有去參加半馬拉松，笑稱打佢工舒服到跑長跑都得喎。
田二少橫街開檔
主角田北辰尋日落手落腳招呼街坊，現場仲有粉絲問佢攞簽名添，認真威水！二少話今次辦事處雖然喺橫街，但人流極旺，如果去大街租金就貴幾十萬，真係嚇死人，佢嚟緊喺屯門會開多個辦事處，未來希望每區開一個。講開又講，新民黨尋日請到幾位鄉事派猛人撐場，二少就話自己平時與人為善，同人人都傾到偈，叫大家唔好諗太多喎。