政情：陳永棋說白鴿黨選特首？

上星期五嘅飯局，雙方低調行事，但規格一啲都唔低，宴客嘅廠商會除會長黃友嘉迎客，元老級嘅榮譽會長陳永棋亦現身款客，民主黨就由主席何俊仁（鐵頭仁）帶隊赴宴。中國政治往往喺觥籌交錯之間進行，呢場為時兩粒鐘嘅低調飯局亦唔例外，話題逐漸由社會民生講到特首跑馬仔。

據與會者透露，棋哥席間突然游說鐵頭仁出戰明年特首選舉，讚民主黨理性務實，又話鐵頭仁比起一啲淨係識用英文思考嘅人好得多，矛頭直指公民黨。棋哥仲話，如果鐵頭仁參選特首，就算唔會畀佢提名票，都會給予精神上支持！鐵頭仁面對棋哥呢頂高帽，當場只有微笑回應，不置可否。

鐵頭仁當講笑

我哋尋日問棋哥，佢承認有叫民主黨選特首，但只係傾談間順口而出，認為民主黨係民主派內嘅最大黨，若民主派選特首，理應以民主黨做代表，人選有鐵頭仁同副主席單仲偕，但鐵頭仁無乜回應，佢亦無再講落去。

鐵頭仁尋日話，飯局只係一個禮貌性會面，同早前黃友嘉去民主黨總部交流經濟政策一樣，並無其他政治含意，又話相信棋哥叫佢出選特首，只係講笑，強調個人從來冇諗過落場跑馬仔，民主黨至今亦未有就是否參選統一意見，要思考清楚希望爭取乜嘢先決定點做。

雖然鐵頭仁話未諗選特首，但民主黨內部都有聲音認為派人出選對佢哋有利。一來黨內好多人唔滿意公民黨冇義氣，唔應該再好似○七年咁幫佢哋抬轎，過咗票就一去不回頭；二來明年三月先選特首，就算必輸都可以打響聲勢，對九月嘅立法會選舉起到正面作用，時間啱啱好。最重要嘅係，如果泛民有代表出選，建制派陣營就不得不提早協調以排除同屬建制陣營嘅對手，防止泛民漁人得利，於是變相賣咗個人情畀未來特首，到佢上任時可能會聽多啲民主黨嘅聲音。一石三鳥，好似又真係諗得過喎！