中環出更：梁青華服蔡志明夠魄力
已有廿三年歷史嘅喜運佳鐘錶突然間聲名大噪，事關收藏無數靚錶嘅「玩具大王」蔡志明將佢收為麾下，成為城中熱話。卓妮前日喺酒會度見到有份湊大喜運佳嘅股東兼常務董事梁青華，佢話即使好多投資者有興趣收購喜運佳，但一班舊股東最終一致同意蔡生係最佳策略夥伴。
親歷Franck Muller壯大過程
華哥爆料話，佢哋一班舊股東同蔡志明相識廿幾年，大家都好佩服佢經營事業嘅魄力，為人又和善。因此就算唔少人表示有興趣話要收購喜運佳，舊股東都係認為蔡志明最適合，佢哋正打算大張旗鼓開疆闢土，大家拭目以待啦！
華哥係喺鐘錶業有三十幾年經驗嘅老行尊，閱過無數靚錶，其中Franck Muller廿幾年前進軍香港，同喜運佳創立嘅時間差唔多，所以佢親歷其境睇住呢個瑞士品牌喺香港壯大。當日佢戴住品牌極受歡迎嘅「Long Island」日與夜系列，特別之處係錶面會隨住時間而區分日與夜，加上錶面鋪滿閃鑽，襯埋高貴嘅玫瑰金色，難怪魅力無法擋。