中環出更：孫女腳頭好帶挈田少贏獎金
已經有孫仔又有孫女嘅旅遊發展局主席田北俊，新正頭又抱孫。孫女上星期四出世，腳頭認真好，帶挈爺爺尋日贏取逾十四萬元嘅獎金。
田少愛駒「風雲武士」近期狀態大勇，繼初三勝出頭馬之後，尋日再度出戰沙田馬場，喺第三場賽事跑第二，田少冒寒入場打氣，落注一萬元捧愛駒場。臨開跑前，佢一支公去馬會餐廳歎番個豐富午餐，柯打海南雞髀飯、北芪黨參燉乳鴿湯及凍奶茶，食得好滋味，埋單都唔使一百蚊。
醫飽肚後，田少同黨友張宇人一齊撐愛駒場，大熱嘅「風雲武士」最後跑第二，算有交代嘞。之後佢急急腳趕返屋企，話要爭取時間同四個孫共聚。講開沙田，田少上星期四到沙田田心村拜車公為村民祈福，仲出席村民盆菜宴添。
發叔自爆係「善長」
尋日沙田馬場，仲有鄉議局盃賽，係為咗慶祝鄉議局新大樓落成。鄉議局主席劉皇發滿場飛招呼賓客，似乎未受失落屯門區議會主席寶座影響心情。
卓妮問佢，出錢幫手解決新菜園村路權問題嘅善長有冇出席，發叔好鬼馬咁話：「我咪善長囉！」如果以為佢尋日心情大好所以向卓妮大爆內幕，咁就錯晒喇，佢兜番一句話自己係「馬會善長」，原來佢搞爛緊gag。
發嬸與公子劉業強都嚟撐場，發叔近排是非纏身，發嬸就大嘆老公做嘢辛苦，想佢放下工作，齊齊坐郵輪歎世界，心水地點係地中海同北歐，仲話自己其實不知幾鍾意坐郵輪。對於我哋尋日寫過，話劉業強將暫代父職做屯門區議會主席，兩父子二人同心，齊齊封口。
卓妮