滬港雙城之爭，上海又再先聲奪人，淨係講個勢，香港已經輸足九條街。人哋步步緊迫，香港節節敗退，想扭轉敗局？好難咯！
真係好似整定咁，香港旅遊業啱啱畀導遊同內地旅客大打出手醜聞搞到雞毛鴨血，上海就公布「十二五」規劃嘅旅遊發展藍圖，目標係打造世界著名旅遊城市，雄心勃勃，來勢洶洶，擺明要同香港一決雌雄。
人哋唔係大隻講㗎，上海計劃未來五年斥資超過四百億元人民幣，興建包括迪士尼樂園在內共十三個旅遊重點項目。作為龍頭嘅迪士尼樂園落成後每年可吸引過千萬名旅客，而其他項目亦唔簡單，每項投資額全部過億元，問你服未！
投資大手筆唔在講，仲有埋配套措施添。上海當局會研究試行境外旅客購物離境退稅、旅客免稅購物等政策，吸引旅客消費。有內地學者話，呢啲項目同措施一旦落實，肯定會搶走香港大量客源。老實講，近年香港旅遊業醜聞多多，臭名遠播，加上旅遊景點不足，所謂旅遊之都地位早就岌岌可危，依家仲要面對上海嘅強力競爭，前景真係十分不妙。
其實，除咗上海之外，海南舊年亦已經獲中央批准建設「國際旅遊島」，今年元旦起仲開始實施離境退稅政策，同樣係香港嘅勁敵。點知港府一味扮鴕鳥，唔肯正視來自四面八方嘅競爭，依家仲係懶懶閒，以為仲有大把老本可以食，唉，呢場仗香港唔輸至奇！
話時話吖，中央前年已經拍板，二○二○年要將上海建成國際金融中心同航運中心，呢次上海又確定打造國際級旅遊城市，樣樣都對住香港而來。如果港府仲唔睇清楚大環境，繼續錯判形勢，點止旅遊之都地位岌岌可危呀，唔使幾耐睇怕連金融中心個銜頭都保唔住。
最弊嘅係，港府懶懶閒不特止，仲自欺欺人，一時話無懼競爭，一時話香港仲有優勢，簡直係夜行人吹口哨。其實，所謂無懼競爭，就係一味攤大手板向中央攞着數。呢，回歸十四年嚟，無論九七年金融風暴、○三年沙士襲港定係○八年金融海嘯，港府次次都伸手要求中央打救，搞到連內地同胞都睇唔過眼，揶揄香港「沾了鄧老的福，全國都給你們送人送物」。內地媒體甚至告誡香港咪以為可以長期靠內地「放水」，否則遲早「坐吃山空」。你話係咪丟架吖！
計功夫茶話齋，逆水行舟，不進則退，本港競爭力可以講係王小二過年，一年不如一年，金融、航運同旅遊三大支柱產業，條條都危危乎，睇怕都唔撐得幾耐咯。冇辦法喇，煲呔曾同嗰班問責高官仲有一年幾就收檔，個個以半退休心態過日子，多做多錯，少做少錯，唔做唔錯，點會有所作為吖。唉，政府等運到，高官等收工，唔通香港真係要等摺埋？