勞工及福利局局長張建宗早前就新交通津貼計劃嘅過嚴規限辯護，死撐二人家庭每月入息上限一萬元唔算低，仲話如果兩公婆都有工做，賺到最低工資，已經唔可以話係窮人。梗係喇！張建宗貴為「樓王」局長，民間疾苦佢未必體會到，佢揸住八個物業喺手，佢嘅下屬常秘鄧國威同埋舊下屬謝凌潔貞都望塵莫及。
翻查高官利益申報，發現張建宗填報嘅八項物業，多數由太太持有，包括四個東區出租住宅、一個中西區出租住宅、一個中西區出租舖位、一個東區舖位，仲有一個就係佢哋兩公婆共同持有嘅自住單位，睇到人眼都凸埋，難怪張局長成日將「心繫勞工」掛喺口邊啦，事關心繫勞工嘅前提咪就係佢唔係勞工囉。
比起張建宗，佢嘅常秘鄧國威削好多，鄧國威只得一個自住九龍單位；至於升咗做教育局常秘嘅前勞工處處長謝凌潔貞，就比鄧國威好景少少，有一個連車位嘅九龍區住宅。
綜觀問責高官及政策局常秘嘅申報，大部分無乜變動，只有幾位高官買咗樓，不過係跳出香港。好似政制及內地事務局常秘羅智光，舊年九月增持一個英國自住單位。環境局常秘王倩儀舊年年尾申報中，都多咗一個廣東自住單位，莫非因政府壓抑樓價措施唔掂，搞到佢哋要喺第二度買樓？