政情：霍震宇未收到啟剛喜帖
新年伊始，申請退出國家隊靜待嫁入豪門嘅跳水公主郭晶晶，究竟幾時同已故全國政協副主席霍英東嘅長子嫡孫霍啟剛拉埋天窗，已經成為城中熱門話題。早前霍震霆二弟震寰證實霍家今年有喜事，尋日三弟震宇出席廣東社團總會新春團拜時，我哋第一時間問佢有冇收到喜帖？佢笑得好燦爛說：「未收到喎！」睇嚟大家要再畀啲耐性等吓喇。
呢排大大小小新春團拜酒會多到爆燈，新年流流，最開心係聽到有喜事，所以霍家幾兄弟公開露面，例必被追問呢個問題，相信係佢哋今年最開心嘅煩惱。
轉頭我哋見到近年退居幕後嘅堪輿家蔡伯勵，佢今年九十歲，但依然精神奕奕。埃及局勢紛亂，影響中東局勢，香港又面對高通脹，樓市股市高處不勝寒，卓妮梗要幫普羅市民問佢贈兩句。蔡大師好淡定，話投資者唔使怕，香港經濟點都唔會太差。