政情：王桂壎畀何家爭產煩死
何鴻燊家族爭產案成為全城熱話，除咗升斗市民關注，連律師會會長王桂壎都話日日跟進，不過佢唔係因為個人喜好，而係要應付記者嘅提問。王會長尋日同傳媒茶敍時話，近排經常收到外國記者電話，向佢查詢賭王各房嘅律師中，點解有啲咁經常咁高調出鏡，到底有無違反專業守則，搞到佢好尷尬，事關從來無人提出咁嘅投訴；如果佢主動介入，就變咗好似偏幫某房人咁。
王會長仲話，外國記者唔知點解對中國人爭產新聞特別有興趣，仲走嚟問佢一個人娶咁多老婆係咪唔道德，令佢哭笑不得，惟有請記者去請教社會學家。
已經冧莊做咗兩屆會長嘅王桂壎仲有幾個月完成任期，不過佢尋日爆料，話唔會再競逐連任。至於佢會唔會出選一二年立法會法律界議員，王會長就笑笑口話未諗呢個問題，似乎唔肯閂後門。以前做過立法會法律顧問嘅佢，最終會唔會「回歸」立法會，大家可以拭目以待。