政情：棠哥頸椎手術成功
我哋早前爆料話身兼行會成員嘅工聯會會長鄭耀棠患上頸椎移位，搞到右手同右腳麻痹，多次缺席行會，唔少政界好友都為佢擔心。不過大家可以放下心頭大石，事關棠哥尋日做咗手術，仲非常成功添！探過佢嘅工聯會副會長陳婉嫻話，棠哥康復得非常好，右腳「揮灑自如」，應該好快出院。
由上年十月開始受頸椎移位困擾嘅棠哥，體重曾經急跌九公斤，瘦到臉都凹晒，但佢一直未決定係咪開刀，事關手術風險好高，一旦失敗可能導致下身癱瘓。棠哥幾經考慮後，決定尋日喺瑪麗醫院做手術「斷尾」，消息指今次手術係由脊骨外科權威、港大創傷及矯形外科學系主任陸瓞驥親自操刀，難怪棠哥今次手術咁成功！
尋日傍晚七點幾，嫻姐、工聯會另一副會長林淑儀同老公議員黃定光齊齊去探望棠哥，約半個鐘後離開。嫻姐透露棠哥康復得唔錯，應該好快出得院，但唔肯講確實日期，話怕傳媒會騷擾佢休息喎。棠哥今次大步檻過，特別透過我哋多謝一班細心照顧佢嘅醫護，又多謝政界朋友嘅關心。雖然棠哥康復進度良好，不過始終做咗大手術，嚟緊可能都唔會去北京開「兩會」。開會事小、命仔事大，棠哥要好好保重！