政情：傲慢煲呔曾向政協發老脾
江山易改，品性難移！每年三月上北京開「兩會」前，煲呔曾都喺禮賓府見港區人大代表同政協委員，話聽意見，但佢性格暴烈兼小器，近年呢個民意騷已變質為佢同親中人士駁火嘅戰場，年年出事，無一例外。大家以為佢今年會收斂，點知前日佢見政協委員時，又忍唔住露出傲慢無禮本性，無端端向提問嘅政協王國強（K.K.）發老脾，搞到K.K.中途離席抗議。
近日政府為推交通津貼計劃搞到焦頭爛額，K.K.前日趁機向煲呔曾獻言，話不如將港鐵全面私有化，取消上市地位，然後將車費減一半，等市民唔使搭貴車。通脹惡化，全民受害，K.K.嘅建議無論係咪可行，點講都係出於好意，履行委員職責，但有與會者爆料，指生性驕橫嘅煲呔曾聽完K.K.發言，竟然露出一股不屑神色，以又硬又冷嘅語氣話：「乜嘢私有化呀？係咪國有化呀！即係點呀？收番（港鐵）嚟任佢行呀！」然後冷笑幾聲：「哈哈，哈哈！」極盡挖苦之能事。
與會者睇唔過眼，私下都批評煲呔曾好無禮，仲話煲呔曾可能受民望再現跌勢嘅不利消息影響，成場黑口黑面。據聞佢冷笑完，仲繼續發老脾話，港府幾經努力先至將港鐵上市，唔會倒退搞國有化云云。
K.K.好心幫升斗市民發聲，煲呔曾唔接受咪算囉，竟然出言冷嘲熱諷，真係佛都有火，煲呔曾噏完無耐，K.K.就中途離場。K.K.呢個舉動本來無乜人察覺，但生性小器嘅煲呔曾竟然嘴皮不饒人，當眾叫出嚟：「王國強可能嬲咗我嘞，佢走囉喎。」好多委員私下都為K.K.不值，覺得煲呔曾認真無品！
K.K.厚道 更顯煲呔曾無品
不過，K.K.做主席嘅廣東社團總會尋日舉行新春酒會，一早應承咗去嘅煲呔曾死死地氣現身做嘉賓。問K.K.係咪受煲呔曾「冷待」，佢好有口德，對煲呔曾無半句惡言，話通脹嚴峻，市民最大負擔係住屋同交通開支，佢建議港府回購港鐵，都係想減輕市民壓力，少啲人搭巴士亦有助環保，心知建議未成熟，只想拋磚引玉。
K.K.嘅厚德，更顯煲呔曾無品。其實煲呔曾都唔係第一次因脾氣差同人大、政協鬧得不歡而散，好似○九年為推廣粵劇同政協汪阿姐罵戰，其後同人大會面，做銀行嘅人大吳亮星質疑政府將雷曼迷債責任賴晒落銀行，煲呔曾竟然頂番轉頭，話銀行界做得好差云云。經過K.K.事件，睇嚟以後佢要見人大、政協，搵八人大轎都無乜人會再嚟。