中環出更：政壇名人落區教書無難度
八十後青年搞到港府束手無策，由全國政協常委牽頭嘅香港友好協進會就將港區全國人大、政協組織起來，向九十後青少年埋手，自發做義工落區去中學講國情，當中唔少都係商界大孖沙及專業人士。友好協進會尋日喺中環四季酒店舉行新春團拜暨午餐演講，好多有份落區「教書」嘅人大、政協都有現身，佢哋異口同聲話教書無壓力，有幾個對授課更可謂駕輕就熟。
友好協進會團拜猛人雲集，卓妮見到曾任教統局局長嘅國情計劃召集人李國章、行會成員查史美倫、福建幫頭領楊孫西及盧文端、健康快車創會主席方黃吉雯（小吉）、新鴻基地產非執董郭炳湘、協成行董事總經理方文雄、中投國際（香港）主席劉遵義等。卓妮問李國章教國情有冇壓力，佢話現時每逢周六都會返中大做義工教外科，加上以前教開書，所以到中學講國情絕對無難度。
每人最多只講三堂
不過，李國章形容，做召集人就好似做媒人咁，要將五十個人大、政協「義工」同參與中學做配對工作，佢話目前有意參與學校有六十至七十間，每間學校最多舉辦三場講座，但每個義工最多只會講三堂，所以名額已經向隅。對於有人話呢個計劃係向中學生「洗腦」，李國章就好嚴肅咁話，咁講等於唔尊重班學生，事關啲中學生有自己嘅思想。
小吉談十二‧五規劃
至於查史美倫同小吉都話教國情無難度，好似查太就啱啱去完美國哈佛商學院講咗一堂題為中國金融市場嘅課堂，但由於今次授課對象係中學生，所以佢會以深入淺出方式向學生講解。小吉就話自己一向有組團返內地分享行政管理經驗，平時亦有喺商會午餐會上發表經濟意見，今次駕輕就熟，佢揀咗同學生分享新鮮滾熱辣嘅十二‧五規劃。
卓妮喺新春團拜上又遇到郭炳湘。佢話無參加今次國情計劃，問佢係咪忙於籌組新公司，佢只係話向中學生教國情好有意義，無論點忙都要抽時間參與，佢唔參與只係覺得其他五十個人大、政協教書會較佢優勝喎。
卓妮