呢個勞工及福利局局長張建宗都幾搞笑，啱啱先至話「交津方案絕無調整空間」，一副同議員對着幹嘅狠樣，點不知一個屈尾十就拋出一個「重大的放寬措施」。交津方案今日會喺立法會討論，可唔可以過關呢？計功夫茶話齋，早知今日，何必當初，一早順應民意咪好囉，唔使怕遭受議員「三連廢」吖嘛。等功夫茶同大家介紹一下何謂「重大的放寬措施」先啦。
政府推出「鼓勵就業交通津貼計劃」，原本嘅規定好搵笨嘅，必須以家庭而唔係個人為單位提出申請，二人家庭嘅入息上限係月入一萬元，每月工作時間不得少於七十二小時。搵笨嘅地方有兩點，首先，最低工資今年五月都實施啦，粗略估計每月入息會有五千幾。既然係咁，兩個攞最低工資嘅打工仔加埋已經超出一萬元入息上限啦，點可能有資格申請交通津貼呀？你話唔係搵笨都唔得啦！
其次咯喎，你規定申請人每月工作時間不得少於七十二小時，咁即係擺明唔放兼職人士在眼內啫。香港有好多含辛茹苦嘅草根階層，例如單親媽媽，一方面要照顧仔仔女女，另一方面又要兼職養家，每月工作時間未必多得過七十二小時喎，如果係咁就攞唔到交通津貼，好唔公道啫。
正正由於方案搵笨，所以立法會唔肯收貨，過半數議員講到明反對。張建宗本來企到硬一硬，話方案係最終底線喎。就喺立法會決戰前夕，張老爺臨急臨忙交功課，咁就終於有呢個「重大的放寬措施」嘞。
放寬措施之一係將二人家庭嘅入息上限由一萬元調高至一萬二千元，令同時領取最低工資嘅夫婦都可以受惠。根據張建宗嘅講法，呢個金額比起政黨提出嘅一萬一千六百元仲要高少少。另一個放寬措施係針對兼職人士設立「工時兩級制」，每月工作七十二小時以上可以申領全額六百元，每月工作三十六小時以上都有一半，即係三百元交通津貼。
唉，呢件事再一次說明，石頭不踢不會滾，官僚唔鬧冇交津。交通津貼原本嘅方案基本上係人都睇得出有問題，偏偏就係主事者唔知係太戇居定係太孤寒，硬係冇發覺根本無助於鼓勵就業，而且一意孤行企圖夾硬闖關。如果唔係議員大大聲反對，數夠票足以否決，你估張建宗會唔會從善如流吖嗱？梗係唔會啦。
講到呢度，可能有人會問，乜嘢叫做「三連廢」呀？即係咁，自稱強政勵治嘅特區政府最近已經被立法會連續廢咗兩嘢㗎喇，第一嘢係清水灣郊野公園部分土地納入將軍澳垃圾堆填區，議員否決咗；第二嘢係申辦二○二三年亞運會，議員又係否決咗；假如呢個鼓勵就業交通津貼計劃再一次被否決，咁就係三連廢。
計功夫茶話齋，好心政府學下尊重民意啦，明知侵佔郊野公園犯眾憎，明知申辦亞運不得人心，勉強當然冇幸福。今次交津方案如果唔係終於識得讓步，真係整個三連廢就肉鬼酸咯！