政情：邱騰華趁亂推「垃圾」政策

政府近年成日專揀啲有好多大新聞嘅日子，公布啲富爭議性同負面嘅政策措施，尋日又添一例。尋日嘅大新聞計有勞福局公布新交津計劃讓步方案、馬尼拉人質慘劇死因聆訊、仲有賭王何鴻燊狀告家人嘅續聞等，求其一單都做到頭條，環境局局長邱騰華就偏偏揀喺呢個時間，公布極具爭議性嘅超級焚化爐選址，擺明借其他新聞為自己遮醜，等市民同傳媒兼顧唔嚟鬧少佢兩句。