香港未來兩年有四個大型選舉，政黨自然虎視眈眈。公民黨尋日舉行新春茶敍，大家都關注○七年特首選舉出嚟陪跑、啱啱做咗公民黨黨魁嘅梁家傑（袋巾傑）會唔會再下一城，參加一二年特首跑馬仔遊戲。不過袋巾傑卻顧左右而言他，話要先同其他泛民商討以甚麼態度參與特首選舉，再考慮會唔會參選，顯然冇為再戰特首閂後門。
面對各方追問，袋巾傑嘅黨友首先護駕，話公民黨從來都冇要黨魁出選特首嘅慣例，乜都要等黨集體決定。袋巾傑更加話，希望先主動出擊同各泛民政黨討論參與特首選舉嘅意義，有需要再集體揀個候選人出嚟，唔會依家就話參選。至於幾時有決定，佢話愈快愈好，只係大家仲未坐落嚟傾。
當然，即使袋巾傑想再出嚟陪跑，都未必成功，事關上屆民主黨捧咗佢上神枱後，不特止選票一去不回頭，仲要成日畀公民黨鬧番轉頭；嚟緊袋巾傑想民主黨支持，湊夠一百五十個選委提名拎入場券，難囉！