政情：領匯增優惠籠絡議員？
領匯早前公布，旗下部分停車場將於四月起加價。消息公布後，好多議員出聲反對，批評領匯唔應該加價，加重市民負擔。唔知係咪見反對聲音太大，領匯尋日公布，由三月一日起，加長所有立法會議員同區議員每日免費享用領匯指定停車場嘅時間兩粒鐘，唔知班議員受唔受落呢？
以往每名立法會議員同區議員，每日早上八點至凌晨十二點，都可以喺領匯指定停車場泊車，方便佢哋服務市民，呢項優惠原意其實唔錯，但部分議員之前畀人揭發濫用優惠，搞到滿城風雨。
新安排實施後，以後每日早上六點至凌晨十二點，各位尊貴嘅議員都可以免費享用呢項泊車優惠，領匯方面解釋，話收到唔少有關泊車優惠嘅建議，為配合議員工作時間，所以作出調整喎。至於實情係點，相信只有領匯先知喇。