政情：陳健波打針防病貓同僚
向來注重健康、閒時又喜歡「打坐」強身嘅立法會保險界議員陳健波，身體狀況一向好好，甚少打敗仗；即使流感肆虐多年，佢亦毋須靠流感針去預防。不過波哥近日終於向現實低頭，「處男下海」去打針，迫使佢屈服嘅，竟然係一班立法會同僚。
波哥話，立法會係一個高危之地，事關唔少議員為咗上鏡方便，即使病咗都唔會戴口罩，仲經常閂埋門一齊圍埋噴口水。佢仲自爆，曾經畀經濟動力梁劉柔芬同公民黨黨魁梁家傑兩個「病貓」喺立法會「左右夾攻」，唔夠兩日連自己都冧埋，唔加強防禦力都唔得。
波哥又話，自己一名前同事早前因染上豬流感而不幸過世，囝囝間學校亦有同學染上後搞到「流感上心」要入急症室，更加令佢的起心肝、帶埋囝囝齊齊打針。波哥自小極怕打針，要打針時更會「自動消失」，但佢話今次唔知係支針幼，定係姑娘手勢好，打針時竟然一啲都唔痛，唔排除以後年年打，健康至上。