政情：張建宗悲情牌博一鋪
政府推出嘅鼓勵就業交通津貼計劃搞到一鑊泡，勞工及福利局局長張建宗連日來節節敗退，作出三大讓步後，終於湊夠最少廿九票支持，成功保住交津唔使收番。今次談判峰迴路轉，最後可以挽回劣勢，除咗靠前晚張建宗同建制派密談大打悲情牌，話今次「剝晒衫褲、差啲連呔都剝埋」感動大家外，仲因為各黨派都畀一個說法嚇窒，唔敢唔支持。
交津方案自上星期公布以來，泛民各黨派輪住嚟鬧，不過張建宗一改「好傾局長」嘅態度，多次強調已經退無可退，寸步不讓，令好多政黨摸不着頭腦。其後職工盟李卓人提出終止辯論嘅議案，一呼百應，除咗泛民議員，工聯會、自由黨同五個建制派議員組成嘅「五散人」都分別同意押後，立法會一下子成立咗個「反港府假交津」嘅跨黨派八國聯軍，對政府構成好大壓力。
喺八國聯軍來勢洶洶之際，不同政黨陸續收到消息，話政府希望佢哋三思唔好推翻交津。消息明言，煲呔曾只剩低唔夠兩年任期，加上最棘手嘅政改已過，所以乜都做得出，如果畀李卓人嘅押後議案成功通過，唔排除煲呔曾索性將交津打入冷宮，喺呢屆政府任期內永不重提，變相導致低收入家庭要捱多兩年苦。呢個說法等於同大家晒冷，幾乎語帶恐嚇，嚇窒唔少政團，但實際係咪咁，就要問過煲呔曾至知。
「今次連呔都差啲剝埋」
另有傳聞話，張建宗前晚約見多個建制派代表時，語帶無奈地講咗句：「今次真係剝晒我啲衫，連呔都差啲畀人剝埋。」有與會人士覺得，佢呢番話似乎暗示煲呔曾企硬，即使再逼張建宗都無用；事關煲呔曾覺得，如果改為以個人為申請單位，就會變咗就業津貼，所以無論受惠人數多與少都唔會放寬。
大家可能覺得呢個執着好荒謬，但並非全無根據，因為煲呔曾經常有啲無謂執着，好似復建居屋咁，係唔鍾意就死都唔肯做。前車可鑑，既然當局有三大讓步，大家惟有收貨急轉軚，以免得個吉喎。