中環出更：施榮懷有意選廠商會會長
中華廠商聯合會尋日舉行新春團拜，會長黃友嘉同埋一眾副會長、常務會董同會董齊現身，盛傳有意競逐下屆會長嘅副會長施榮懷，大方承認「積極、認真考慮參選」，另一位盛傳會落場選嘅第一副會長羅富昌就冇現身。卓妮問名譽會長陳永棋同黃友嘉究竟撐邊個，兩個話等佢哋正式宣布先啦。
施榮懷一入場，卓妮就捉住佢打探虛實，佢滿面春風坦言有意參選。企喺隔籬嘅會董一聽到「參選」兩個字，講笑問佢係咪參選立法會。梗係唔係喇，依家講緊嘅係十月舉行嘅會長選舉，唔係立法會選舉，所以尋日無到嘅廠商會立法會議員林大輝一啲都唔使擔心。黃友嘉話，廠商會人才濟濟，歡迎有熱誠嘅人出嚟為會員服務。棋哥就四両撥千斤，話廠商會好和諧，大家會有共識㗎！
顏吳餘英高招抗工人荒
廠商會嘅會員以中小企業為主，尋日有咁多中小企業老闆歡聚，話題梗離唔開為經濟把脈。雖然好多喺內地設廠嘅港商呻難請人，但從事玩具業嘅副會長顏吳餘英就有留人高招，佢哋位於東莞同韶關嘅廠房，春節後復工首日已有八成人返回工作崗位，至今累計達九成，佢嘅秘訣係幫工人買妥來回車票，又預先宣布三月一日加薪近一成九；老闆咁有心，打工仔梗係開心返工啦。
會董黃家和係香港餐飲聯業協會會長，佢就預告飲食業今年將大幅加價約一成五，事關食材、租金、人工同人民幣匯率都急升，餐飲零售業都頂唔住，免不了要加價。
