中環出更：胡曉明帶隊 征非賞奇觀

香港人愛旅遊，但專資會特別識玩，○九年底組團探索南極，由極地探險家李樂詩籌劃，協會今年想去埋北極，但李樂詩已收山，所以改由身為會員嘅新華旅遊董事總經理楊章桂芝組非洲之旅。

團費七萬 名額爆滿

胡曉明同卓妮講，去東非睇動物大遷徙有時間性，個團七月二十日出發，頭尾十二日，先去南非約翰尼斯堡，再到東非肯尼亞睇動物大遷徙，然後轉往非洲中部觀賞世界最美麗瀑布之一嘅維多利亞瀑布，再坐火車一邊欣賞沿途異國風情，一邊南下太陽城。節目豐富，團費盛惠七萬蚊，胡曉明話二十個名額一早爆滿，向隅會員惟有列入候補名單。

專資會多專業人士，尋晚好多政界人士畀面捧場，財政司司長曾俊華、行會召集人梁振英、總商會立法會代表林健鋒、全國青聯副主席陳仲尼，以及身為會員嘅立法會議員譚偉豪同梁美芬都有出席。依家人人熱論點樣投資抗通脹，胡曉明妙論心得話：「將啲錢畀晒太太囉。」暗讚胡太投資生財有道，又指樓價高企，投資人民幣債券，每年可賺三至五厘息，加上升值潛力大，係穩陣嘅抗通脹妙法。陳仲尼就鍾意分散投資，股票、外國房地產同黃金等貴金屬都有投資，佢話喺通脹狂潮下，「錢已經唔值錢架嘞」！

（左起）創會會長容永祺同榮譽顧問陳祖澤幫手招呼三名立法會議員林健鋒、梁美芬同黃定光。

胡曉明（右）舉起酒杯，宣布帶隊遠征非洲。左起為常務副會長謝偉銓、陳祖澤。 （徐家浩攝）

卓妮