死性不改呢家嘢，對於淫賤黎而言絕對係千真萬確，而且遺禍不止香港，更加連台灣都搞到烏煙瘴氣。呢嗱嗱嗱，台北市衞生局公布違規廣告排行榜，台灣爛果報再一次「榮登冠軍」，去年以刊登四百五十四件違規廣告大幅拋離其他報紙。淨係一份台灣爛果報已經佔所有報紙違規總數嘅一半以上，你話係咪害人不淺吖！
至於雜誌類咯喎，台灣《壹週刊》梗係「為賤不甘後人」啦，去年亦以二百六十件違規廣告「力壓群雄」，成為最誤導讀者嘅一份無良雜誌。
既然壹淫媒被台北市衞生局列為刊登違規廣告嘅第一名，當地新聞團體當然口誅筆伐，異口同聲譴責淫賤黎旗下刊物違反新聞倫理原則，形成欺騙民眾嘅共犯行為，甚至可能遺害民眾身體健康，非常之咁不道德。所以咯喎，不齒其行為嘅新聞工作者就呼籲嘞，台灣政府應該重重懲罰，以維護民眾權益。
乜嘢叫做違規廣告？即係咁，有部分奸商會誇大其詞話某某食品可以豐胸，某某藥物又可以壯陽，消費者一不小心上咗當，輕則全無功效，重則小命不保。壹淫媒唔理新聞倫理原則照登可也，無非係見錢開眼，務求賺盡不義之財吖嘛。
好嘞，台灣政府到底會唔會重罰壹淫媒？記憶所及，台灣政府唔係未試過出動打狗棒狠狠嚴懲淫賤黎。好似爛果報推出掛羊頭賣狗肉嘅「動新聞」咁吖，利用電腦技術販賣色情暴力，激起社會公憤。台北市政府眼見民間組織浩浩蕩蕩操去壹淫媒抗議，市長郝龍斌即刻弘揚正氣，非常果斷向壹淫媒宣戰，三日之內以雷霆萬鈞之勢使出五招痛擊，包括連續施以巨額罰款，又禁止學校訂閱爛果報。
計功夫茶話齋，台灣政府點都冇可能學似香港政府咁姑息養奸，更加冇可能擺明車馬包庇縱容。遠嘅唔講吖，淨係睇睇最近兩單荒謬到極嘅放生事件。爛果報網站上載一段名為「大咪俾人，平胸亦自信」嘅短片，片中可見女性胸部特寫，其中一段仲係裸胸露點，無遮無掩清晰可見。淫審處本來已經將短片評為第二類不雅物品，正常係要檢控嘅，點不知影視處居然話，由於有關網站負責人已刪除片中不雅內容，所以唔會採取進一步行動。喂，賊佬偷咗人錢，然後原銀奉還，係咪可以當冇事呀？人哋插你一刀，然後掹番出嚟，唔通執法者又不必採取法律行動？
至於另一單，情節差不多，壹淫媒網站以「如何自行檢查乳房」為名播出女子裸胸短片，淫審處又係評為第二類不雅物品，影視處又係話唔會採取法律行動。
其實壹淫媒喺香港違反《淫褻及不雅物品管制條例》過百次㗎喇，港英餘孽餐餐都係徇私賣放，從來未試過重罰死性不改嘅積犯。
唉，總之台灣政府點都叫做有相當正氣，適當時候識得儆惡鋤奸，反觀香港政府就全力護淫，慌死淫賤黎會甩咗一條毛。九七回歸前如是，九七回歸後更甚，回歸不如未回歸。
咦咦咦，既然係咁，淫賤黎會唔會希望兩岸可以早日統一呢？台灣一旦回歸，情況隨時又係好似香港咁烏煙瘴氣，即係改正歸邪，到時咯喎，淫賤黎咪可以肆無忌憚誨淫誨盜囉，仲可以得到百擒百縱嘅超級特權優惠添，爽都爽死啦！