政情：新濠春茗何猷龍潛水
澳門新濠天地高層尋日春茗宴請港澳傳媒，賭王何鴻燊二房嘅兒子何猷龍作為新濠博亞娛樂集團主席兼行政總裁，竟然無現身春茗，只派出幾位高層招呼港、澳兩地傳媒，為乜連新濠天地呢個「親生仔」都唔理呢？
猷龍近期真係好唔得閒，除咗因為旗下公司捲入歐文龍貪污案是非困擾外，未幾又要應付幾房人分家產風波，賭王早前透過律師高國駿入稟要二、三房歸還Lanceford嘅股份，每當賭王駕臨二房谷栢道大宅時，猷龍頻頻現身，據聞係游說父親手下留情唔好打官司，目前仍在斡旋之中。咁多麻煩嘢加埋一齊，真係想得閒都幾難囉！
唔知係咪幾房人忙於招呼賭王到臨，二、三房嘅主要人物都缺席過去兩日嘅新春團拜，好似前日嘅東華三院團拜，身兼東華副主席嘅三太陳婉珍都缺席，尋日輪到澳門新濠天地搞傳媒春茗，揸弗人二房何猷龍都無現身。