政情：肥彭爭筍工凍過水？
英國廣播公司（ＢＢＣ）信託主席之爭嘅最後入選三強名單曝光，除咗前港督彭定康打晒開口牌恨做之外，之前有報道話曾任英國《金融時報》編輯嘅英國工業聯合會會長蘭伯特（Sir Richard Lambert）都有興趣，原來最後殺出個勁敵，就係劍橋Newnham College校長帕特里夏‧霍奇森勳爵（Dame Patricia Hodgson），睇嚟肥彭要跑贏呢兩個對手，難度相當高。
三名應徵者將會由一個獨立遴選委員會挑選，並由文化大臣侯俊偉（Jeremy Hunt）親自面試，面試後兩星期再向首相呈交人選建議。講番ＢＢＣ信託主席呢份筍工，年薪高達一百三十萬港元，即月薪逾十萬港元，難怪咁多人爭住做。蘭伯特係傳媒出身，有豐富金融管理經驗，人脈才能等各方面都好強勁，起碼無肥彭被捱批嘅保守黨背景，而霍奇森勳爵係劍橋校長出身，背景相當優秀，睇嚟肥彭要見成份工真係凍過水。