政情：KK假戲真做借勢谷票
「人民力量」首腦黃毓民早前高調放風，話自己會喺年尾嘅區選狙擊民協馮檢基（KK），更喺對方地頭開咗兩個辦事處造勢。不過，據悉呢啲全屬毓民製造出嚟嘅假象，真正狙擊KK嘅係佢嫡系徒弟「滷味男」錢偉洛至真，而毓民咁做只係想借「狙擊馮檢基」呢個噱頭，谷谷自己同滷味男嘅人氣，到最後更加有可能抽身唔選！
面對毓民「假狙擊」，KK亦不甘被利用，一個反手嚟個假戲真做。佢尋日同傳媒大呻，話人民力量早喺幾個月前已開始落去深水埗三、四個選區，左右夾擊佢同一班有意出選嘅民協成員，不但喺區內擺街站及派傳單抹黑民協，甚至動員搞「迷你遊行」聲討佢哋。KK嘆謂，人民力量此舉，確實對佢造成一定影響，更直言自己上屆區選只係險勝對手八十五票，毓民要搶佢票簡直易如反掌，聲言自己已預咗會有七成機會失去議席喎。
KK咁樣呻慘，無非想將計就計，話畀大家知佢勢危，趁機谷番啲傳統支持者出嚟撐佢啫。一個假狙擊，一個扮被狙擊，區選前哨戰經已咁精彩，相信嚟緊好戲只會陸續上演。