政情：周一鑊懶理中藥業困境
《中醫藥條例》規定中成藥未註冊就唔可以售賣嘅條文實施咗兩個幾月，五千幾種中成藥註唔到冊無得賣，中醫藥業界望到頸都長，尋日終於可以喺立法會衞生事務委員會嘅特別會議向政府表達佢哋嘅困難，點知食物及衞生局局長周一嶽呢個負責監管中成藥最高層官員不但無出現，食衞局官員都無一個官員露面，最高級嗰個官方代表只係衞生署助理署長（中醫藥）林文健，聽講佢仲未坐正，就要為周一鑊擋煞。議員會都未開即刻炮轟周一鑊，話佢唔尊重議員，要求向內務委員會反映，去政務司司長度「插」佢。
廿幾個中醫團體齊集立法會，希望政府聽吓佢哋嘅聲音，食衞局無人出席，議員當然好㷫，梁美芬話食衞局無人嚟，業界就係「向住空氣講嘢」，達唔到會議嘅目的，中藥業好多人因政府嘅中藥政策搞到要執笠，佢對局方無人嚟極之失望。
食衞局龜縮捱轟
潘佩璆更批評周一鑊連聽意見都費事聽，唔尊重議員。鄭家富指食衞局矮化立法機關，「唔畀面公眾聲音」，要求向立法會內會反映，講畀政務司司長聽，等周一鑊尊重吓議員。余若薇都忍唔住，對政府無派局方官員出席表示遺憾。
其實業界為佢哋嘅中藥申請註冊，用咗唔少錢做安全和質量檢查，都達唔到中醫藥管理委員會嘅要求，好多家喻戶曉嘅老字號可能從此消失，屬於中小企嘅中藥廠更加無啖好食，要求衞生事務委員會成立專責小組，重新檢討《中醫藥條例》，可惜無局方官員聽到佢哋講。
會上最高級嘅政府代表林文健九六年中文大學醫學院畢業，○五年獲得公共衞生醫學專科資格，喺衞生署多個部門做過，依家係助理署長，佢嘅背景唔失禮，但點都唔夠牙力代表政府喺會議上抗衡議員同業界，佢只有處處為局長護航，話局長對業界嘅問題關注，又重申尋日無局方代表出席，但局署之間有緊密合作，好重視業界意見咁話，之後就由○三年起開始講政府同中醫藥業界點樣溝通，施政報告對香港中醫藥發展點樣重視，同埋衞生署喺呢方面做過啲乜。衞生事務委員會主席梁家騮都忍唔住叫停，要佢搞清楚自己嘅角色。