中環出更：余錦基潮着「古董」唐裝衫
足球總會董事余錦基向來穿衣有道，日前佢出席新春酒會時，更刻意以一身唐裝打扮應節登場。唔好以為呢件只係一件普通國貨公司都有售嘅唐裝衫，事關件衫足足有成七十年歷史，絕對係「一級歷史文物」！
70年歷史鎮家之寶
基哥日前穿上呢件灰色冷絨面嘅唐裝衫，出席民政事務局新春酒會，下身再配以唐裝褲及黑色皮鞋，中西合璧，有型有格，同其他西裝骨骨嘅賓客形成強烈對比。
基哥同卓妮講，自己一向對唐裝衫情有獨鍾，一來貪佢夠應節，二來亦勝在夠襟着，仲指住自己件唐裝衫，自爆件衫係佢爸爸傳畀佢嘅鎮家之寶，「有成七十年歷史，你話襟唔襟着嘞！」
基哥早前已經着過一件佢媽媽家傳、有成五十年歷史嘅豹皮大褸亮相，依家仲「加碼」，着件七十年歷史嘅唐裝出嚟「晒冷」，佢份人咁念舊，又識得將「古董」潮着，認真係既環保又念舊。