中環出更：福建幫新春酒會官商雲集
卓妮尋日下午去咗福建社團聯會嘅新春團拜，見識咗本港過百萬閩籍人士嘅氣勢，事關佢哋位於北角屈臣道嘅新會所好開揚闊落，但湧到現場嘅鄉親、港府、中聯辦官員同立法會議員等嘉賓，多到幾乎將現場逼爆。
福建幫一年一度嘅大歡聚，又點少得福建幫頭領施子清、楊孫西、盧文端三兄弟，近年深居簡出嘅前基本法副主任黃保欣都現身撐場，難怪聯會會長林樹哲忙到飛起。卓妮見楊孫西飲到滿面通紅現身，佢話呢排應酬多，做茶葉生意嘅佢笑稱要飲茶解吓酒。
林樹哲愛賀年小食
不過現場有好多惹味家鄉賀年小食，例如香軟嘅柑紅糕、咬落有麥芽味嘅香脆麻棗同埋花生糕等，一眾大老闆都好似細路仔咁愛不釋手。盧文端就企埋一邊剝柑慢慢歎，唔知係咪近排應酬飯食得多，所以偷閒補充啲維他命C？卓妮問林樹哲最鍾意食乜嘢？佢不假思索話：「全部都鍾意！」
福建幫嘅新生代亦齊齊現身，包括全國政協林銘泰嘅囝囝林智彬、施子清兩位公子施榮怡同埋施榮忻。林智彬近年愈嚟愈活躍，公職包括百仁基金副主席、中華總商會青年部副主任等，卓妮問林銘泰阿仔做得好唔好，佢笑到見牙唔見眼，勁讚：「好啊！樣樣都好！」