中環出更：楊釗講佛偈 分享人生三樂

「牛仔褲大王」楊釗係虔誠佛教徒，佢慨嘆香港物質生活豐富，但唔少人只管向錢看，追逐名利，成個社會感覺好壓迫。楊釗分享「人生三樂」，就係知足常樂、助人為樂同自得其樂，希望大家好似佢咁，學會放下。卓妮問佢，上福布斯香港富豪榜前開心啲，定係上富豪榜後開心啲，佢諗咗一下，答案係：「一樣咁開心。」

卓妮轉頭撞見立法會中總代表黃宜弘（IQ博士），係人都知佢愛茅台，佢三句不離講酒經，自爆早前訂咗二十箱茅台，仲拍心口預留三箱畀老友，點知來貨最後只得五箱，計計數，自己其實只得兩箱，話咁快飲晒，呢排惟有飲少啲。

孫大倫（右）同陳正欣兩個大男人交換護膚心得。

酒會人氣旺，立法會議員林大輝（左起）、前保良局主席李張慧美、霍震霆齊撐場，右一為霍啟剛。 （嚴少阡攝）

富士攝影器材主席孫大倫（Dennis）就拉住保良局總理陳正欣講扮靚，皆因Dennis近日代理埋富士護膚品，自己做生招牌之餘，仲送咗一set畀陳正欣試用，兩個大男人尋日碰頭，互相交流試用心得，Dennis仲即場彈吓自己面珠，問卓妮：「我皮膚好唔好？」愛靚唔係女人嘅專利，趁新春扮靚啲，人都醒神啲。

海洋公園主席盛智文（右）着起唐裝，同全國政協常委陳永棋互相拜年。 （蘇文傑攝）

經濟動力梁劉柔芬（左）近日抱恙，出席酒會特別難得。右為林健鋒。 （徐家浩攝）

Tim霍「趁後生」遊世界

港協暨奧委會會長霍震霆（Tim）同紅鶯星快動嘅公子霍啟剛同場出現，一提娶新抱，Tim霍一味甜笑，啟剛睇落Fit咗，肌肉結實咗，未知係咪為娶郭晶晶做好瘦身準備。Tim霍啱啱出席完哈薩克斯坦嘅亞洲冬季運動會，講起難忘事，佢自嘲係「替工」，負責將大會旗幟交畀下一屆主辦國。Tim霍又笑稱自己年紀唔細，希望趁後生環遊世界，出席唔同國家嘅體育盛事。乜佢嘅願望唔係已經經常實現緊喇咩？