謝廷駿求救電話錄音
第一段：謝廷駿與分行經理王敏儀（借調客戶服務部）對話
王：你好，康泰旅行社顧客服務部，我姓王，有乜可以幫到你？
謝：你係邊位？
王：唉，我係姓王嘅，有乜幫到你？
謝：喂？我係freelance（自由身）同事Masa。
王：係。
「成個衝上嚟呀」
謝：我哋係馬尼拉四天，出發日子係20號，編號係PMK04。
王：唉，20號PMK04。
謝：依家有啲好大鑊嘅問題，依家有個軍人就上咗我哋部車，挾持咗我哋成部車，就去到國父黎剎公園。國父黎剎公園度停低咗，咁佢就同啲警察講數。
王：點解呀？呢個軍人係點……乜軍人呀……
謝：菲律賓嘅軍人。菲律賓嘅軍人。佢有兩把槍喺手度。
王：吓吓？
謝：我哋成部車係唔郁得嘅！
王：係係係。點解可以畀佢上到車嘅？
謝：佢唔係畀佢……我哋係畀佢成個衝上嚟呀（語氣急促），我哋行完景點，我哋依家畀人挾持緊呀，你明唔明呀？
王：哦，明明明，你等我一陣吖！
（電話錄音此時轉到顧客服務部助理經理陳小冰）
「我靜靜雞打電話」
第二段：謝廷駿與顧客服務部助理經理陳小冰對話（節錄）
陳：S841，咁依家啲客……
謝：我喺車中間，佢唔畀我㩒電話，啲客坐晒喺我側邊，所有手提電話畀個GUIDE（導遊）KEEP住，唔畀我哋打電話。
陳：咁啲客點情況……。
謝：驚囉！
陳：咁兩個軍人情緒……？
謝：一個軍人咋，唔穩定，一唔聽佢話就攞槍出嚟。
陳：依家同佢對話緊係邊個？
謝：未有人對緊話。
陳：點解唔可以搵導遊？
謝：導遊喺㗎車度。
陳：咁可唔可以畀導遊落車，搵警察傾呢？搵番當局嘅人傾呢？
謝：我都知，佢依家打緊電話，依家好似有警察喺附近到咗，講緊電話。我通知你哋先。轉頭收埋我個電話。
陳：通知個LAND（地接旅行社）未？個LAND有乜講？
謝：未知。
陳：未知？
謝：係呀，話聲你知。
陳：仲有無聯絡電話？
謝：我睇吓KEEP住個電話，因為佢收晒所有客嘅電話，我靜雞雞打電話。
陳：依家位置？
謝：國父黎剎公園。國父黎剎公園。馬尼拉嘅。
陳：冷靜啲。同埋叫啲客千祈唔好叫，如果唔係會令嗰個人情緒更加失控。
謝：係啦，就咁，OK，拜拜。