開講都有話，書中自有黃金屋，書中自有顏如玉，係就係巿儈咗少少，不過始終係好多人讀書嘅目的，無非希望一張畢業文憑換取黃金屋同顏如玉。
讀書途徑有好多，不過有一件事非常之咁古怪，睇怕搵勻全世界搵唔到，特區政府一手特別創立嘅毅進課程居然不獲官方承認，讀完書莫講話冇黃金屋同顏如玉，唔使揸兜都偷笑！
呢嗱嗱嗱，唔係功夫茶老作㗎，成班屋宇署合約助理文員尋日就怒氣沖沖走咗去政府總部抗議，正正係因為毅進學歷原來唔符合政府嘅入職要求，隨時陷入失業危機。
毅進到底係乜東東？呢個絕對係香港官僚嘅創意發明，當年過氣特首董建華發覺失業率太高嘞，中學畢業生一窩蜂投身職場肯定大鑊，於是乎，眉頭一皺，計上心頭，好啦，就喺中學同大學之間額外加一個課程叫做毅進。官老爺又宣布，毅進畢業等同會考五科合格。講得好聽係創意發明，講得難聽係不倫不類，毅進根本兩頭唔到岸，事關制度上冇配套安排。
好衰唔衰喎，屋宇署最近提高外判合約助理文員嘅入職要求，由原本只需中學畢業提升為會考五科合格，包括中文、英文以及數學科，咁就趕絕毅進畢業生嘞。
大家可能會問，咦，既然毅進畢業等同會考五科合格，咪符合新嘅入職要求囉，咁又有乜嘢問題呢？點解話係趕絕佢哋？
大家有所不知，本地官僚辦事作風好無稽兼夾混帳㗎，毅進畢業名義上的確係等同會考五科合格，不過唔包括數學科。換句說話嚟講，一旦撇除數學科，毅進畢業極其量只算等同會考四科合格！
工會總幹事張麗霞講得冇錯，屋宇署更改學歷要求係帶頭製造失業。立法會議員李卓人亦認為，政府若然更改學歷要求，整個毅進課程變得形同虛設，佢仲質疑：「毅進都有中、英、數嘅課堂讀，點解會唔承認呢！」
至於香港成人及持續教育協會副會長張民炳，佢係咁講嘅，報讀毅進課程嘅主要誘因係獲得認可投考政府工，但現時政府帶頭打擊課程嘅認受性，毅進成為「不能兌現的支票」，擔心有更多機構跟隨政府嘅做法。
假設你係毅進學生，忽然見到屋宇署有咁嘅入職要求，你會有乜嘢感想呢？好明顯啦，你會覺得被搵笨，報讀一個不獲承認嘅課程，簡直就係浪費青春。正如一個喺屋宇署做咗四年嘅毅進畢業生阿京話齋：「我仲報咗高級文憑希望學歷足啲，依家讀咩都冇得補飛！忽然一腳踢走我，我都唔知點算！」
所以話啫，本地官僚辦事作風真係好無稽，明明係自己一手創立毅進，到頭來自己唔承認。打個譬喻吖，官老爺就好比未婚媽媽，匿喺廁所生咗一個小寶寶，生完又唔肯認係自己嘅骨肉，然後一手掉落街！
唉，計功夫茶話齋，後生仔女最好都係依循正路嘅讀書途徑奮鬥上進，千祈唔好誤墮混帳官僚嘅搵笨圈套呀！